دي هي إيران !
منظر من نفس الشباك بتاع المنظر الاولاني بس زاوية تانية
واللي ظاهر في الصورة هو مركز شباب عابدين اللي مش في عابدين 
حفلة أنا ليه ليبرالي
فاكرين المسابقة اللي كنت قولتلكوا عنها قبل كده .. واللي كانت بتارجيت ان كل واحد شايف نفسه ليبرالي يكتب مقاله يجاوب فيها علي سؤال .. انا ليه ليبرالي ؟
والمقالات دي بعد كده تنزل في كتاب .. ويتسمي برضه بـ ” انا ليه ليبرالي “
فاكرين مش كده
المهم ان حفل توزيع وتوقيع الكتاب هيكون في ساقية الصاوي يوم التلات 16 يونيه في قاعة الكلمة الساعه سبعه ونص .. وهيعلن فيه كمان التلت مقالات الاولي
طبعا كل ده بينظمه إتحاد الشباب الليبرالي .. بالتعاون مع مؤسسة الفردريش ناومان .. او في مقوله اخري الفغيدغيك ناوناو
أشوفكم هناك
فصل في سب ولعن المدعوا - كيُوبِيد
إبن إمه فينوس .. او أفروديت .. ويقولك ساعة ما يرمي السهم علي حد يقع في الحب علطول
أحد أصدقائي الأعزاء ..قالي بعد تنهيده عميقه .. اصلي كيوبيد ده لما بيرمي السهم مبيرمهوش في قلب الواحد .. بيرميه في عنيه .. فيعميني ومبنعرفش اذا كان اللي بتحبها دي حلوة ولا وحشه .. طيبه ولا شريرة .. ولا حتي بنت ستين في سبعين .. اصلي المحروش رمي السهم .. والطوبه جات في المعطوبه
طب والنبي مش عيب عالإغريق يخلوا حتة عيّل زي ده إله ؟ .. لا وإله إيه ..الحب .. الغرابه بقي .. ان معروف انه ابن أفروديت .. بس مش معروف فين أبوه .. وانتوا طبعا عارفين ان مش من أخلاقي ان اجيب في أعراض الناس.. وخصوصا لو كانوا ألهه إغريقية ليها مكانتها التاريخيه مهما إختلفنا معاهم !
بس انا عندي مبقوق حبتين .. اصلي لو قلنا انه عيّل وبيعمل تصرفات مش محسوبه يعني .. والمفروض نستحمله .. فممكن نستحمل انه يرمي السهم في قلوبنا ويخلينا نحب واحده مش اد كده .. لكن انه بروح أمه - اللي هي افروديت - يرمي السهم في واحد ويسيب التاني ؟ .. دا انت كده عايز تنتقم من الطرف الاولاني بقي !.. وشكلك كده منفسن منه .. وقلبك مش ابيض زي ما انت لابس يامعلم … لانك هتطلع عينه وحاجات تانيه هتطلع كمان .. وياريت في الاخر هيطلع بفايده … ده في الاغلب هيطلع بخساره ياسي كيوبيد النيله انت !
ولا مثلا تكون الاسهم بتوع اليوم اللي انت كنت نازل بيهم خلصوا .. وده اللي خلاك ترمي السهم علي واحد بس .. طب يابن الناصحه مش المفروض تاخد معاك عدد زوجي من الأسهم ؟
ولا تخلينا نتبهدل البهدله دي كلها يعني ؟
عالعموم .. بطلبها منك صريحه .. واضحه .. معلهاش جدال .. او فيها نقاش .. ياكيوبيد يابن افروديت .. فكك مني !
أشطا ؟
الفرح
الموضوع بالنسبه لي مكانش اكتر من خروجه لطيفه صحبه حلوة وشوية فشار وبعديها ممكن الموضوع يوصل لعشا خفيف
بس الحقيقة مقال الهواري في عشرينات عن الفيلم جري ريئي وقولت اكتب كلمتين .. طبعا اكيد مهماش رد علي هواري .. هما بس كلمتين في نفس الموضوع
الفيلم وبإختصار شديد تيمته الرئيسية هي انه جايب حبة ناس بيعانوا من مشاكل إجتماعية مختلفة .. وجمعهم في موقف واحد وهو الفرح
الفرح معمول بمفهوم - افراح الجمعيات - … يعني الناس ليهم نقطه وبيملوها .. وكمان مأجرين العريس والعروسه عشان يعملوا الفرح ويلموا النقطه وحلوا مشكلتهم الإقتصادية .. ويحققوا طموحهم في إنهم يشتروا ميكروباص يسترزق منه الاخ الاكبر
في وسط الفرح بقي .. بتظهر كل شخصيات العمل .. من اول العريس والعروسه .. اللي مكتوب كتابهم من خمس سنين ومش عارفين يتجوزوا .. وجم يمثلوا دور العريس والعروسه عشان ياخدوا فلوس يعملوا عملية - ترقيع - بعد إصرار الاهل ان الدخله تبقي - بلدي - ولأن هما بقالهم ست سنين كاتبين كتابهم .. فمارسوا الجنس اكتر من مره مع بعض .. وبالتاللي العروسه فقدت عذريتها من غير البرواز الإجتماعي بتاع الفرح والدخله البلدي وبتاع
وانا شفت الشخصيتين دول اد ايه بيمثلوا العادات الإجتماعية والتقاليد المتخلفة .. اللي حتي ملهاش علاقه بالدين !وبيعانوا منها معاناه كبيره خصوصا بعد ما بيتحرش بيها الدكتور وهو بيعملها العملية !
وبيدور حورا بينهم فحواه - إزاي أهلنا - ميفهموش ان الجنس بياكل في جتنا كل يوم والتاني .. واننا مجتاجينه لأنه طبيعه وغريزه جوانا ويرفضوا يجوزونا ويلمونا كل السنين اللي فاتوا
من الشخصيات التانية اللي موجوده في الفيلم هي شخصية حسن حسني ومي كساب .. الراجل اللي كل حلمه انه يقضي مع مراته ليلة خميس حمرا .. بس صوت الميكرفونات العالية بتاعة الفرح مش مخلياه يقدر يتهني بدقيقة واحده
دنيا سمير غانم كمان كانت عامله دور كويس اوي وهو دور البنت المسترجله اللي مستنيه واحد يخرج منها كل انوثتها ويتهني بيها ..
كريمة مختار .. فعلا قالت لسوسن بدر توبي يابنتي وبطلي رقص .. هواري كان رأيه ان دي صوره من صور إملاء النصائح .. لكن في سياق درامي مقبول .. الست كبيره ..وبتموت بعد مشهدين .. وبتقولها يابنتي بطلي رقص .. زي ما قالت لإبنها .. يابني بلاش بيره وحشيش علشان متجنسلناش الليله ..
وبعد كده عمل اللي علي مزاجه
علي اي حال انا شايف ان ده كله .. كان في سياق درامي .. مش في سياق نصائح مباشرة للجمهور .. بصيغة اغسلوا رجليكم قبل ما تناموا يعني
خالد الصاوي كان عامل شغل كويس اوي برضه .. ولبس الشخصيه كويس اوي .. انما ريجينا حسستني انها طالعه من مسلسل المال والبنون
نهاية الفيلم بقي .. بترمي في قصة ايه .. - متستزكاش عالقدر - وبصراحه مع عدم اعتراضي عليها .. لكني مش حاببها
مودي راب والراب .. حفلة في إسكندرية يوم 26
مسمينها أكبر تجمع للراب في مصر .يوم 26 اللي جاي في جيزويت إسكندرية ..
الحفلة هينورها مودي راب ..مودي كان من اول الناس اللي سمعت علي ايديهم الراب العربي .. وبعد كده بقيت بتابع وبدور علي اغانيه في كل المكان
واي كرو ، سماك ، عطوه ، نصير ورامي دنجوان .. كل دول كمان هينوروا الحفله .. وفي اراء تانيه هيولوعها 
..
هتبقي ليله زي الفل .. اشوفكوا هناك
إعملوا بلقمتكم ياعالم يامعفنه !
في زيارة أوباما الأخيره للقاهره .. شوارع القاهره ببساطه ..اتقفلت … للمارة وللسيارات ..
وبيتقال علي ده انه علشان خطه امنية .. ده اسمه ترييح دماغ مش خطه امنية .. الخطط الامنية علي اد معرفتي مش كده
يعني مثلا .. لو مطلوب تأمن غرفه ما .. ممكن تركب كاميرات وتحط ليزر وبتاع .. وممكن ببساطه تسد ابوابها وشبابيكها بالطوب الاحمر .. انهي فيهم اللي اسمه خطه امنيه ؟
طيب .. وبنفس الفكرة والاسلوب هنلاقي الموقف مختلفش كتير من وزارة الداخلية لوزارة الصحه .. اليوم السابع طالعه علينا وبتقول ان فيه كلام جوه وزارة الصحه انهم يقفلوا متروا الانفاق ..
هما الناس دي فاكره انها كده بتقوم بشغلها ولامؤخذه .. ؟
أعملوا بلقمتكم ياعالم يامعفنه
صميط وبيض وجبنه ..
الصورة في رمسيس جنب سور مسجد الفتح .. عارف الجوده مش اد كده .. بس شغال يعني
Closing The Gap - قرّب المسافه
Guys, find all info about workshop to preduce 10 Egyptian social ads. in this facebook group.
ورشة عمل لإنتاج عشر إعلانات إجتماعية .. ممكن تلاقي كل المعلومات في جروب الفاس بوك ده
او بس تابعونا